Sari-Sari Store

Sari-Sari Store

(Jn. 7:40-53)

Only in the Philippines…

Nakakatuwa tayong mga Pilipino. Kapag gustong mag-umpisa nang business ang una agad naiisip ay ang pagtatayo nang sari-sari store. Kahit na saang bayan ka magpunta laging may sari-sari store. Hindi lamang isa kundi marami at ang iba ay dikit-dikit pa. At ang nakakamangha ay pareho din naman ang laman na kanilang tinitinda. Minsan naiisip ko nga: “Kumikita pa kaya sila?”

Sabi nang iba ang dahilan daw nito ay sapagkat tayong mga Pilipino ay gusto natin na makuha agad ang tubo sa ating ginagawa. Gusto agad daw nating makita ang bunga nang ating pinaghirapan.

Hindi po to masama pero minsan nadadala natin ito sa pananampalataya. Gusto natin may bunga agad lahat. Sa pagdarasal, gusto natin ibigay agad-agad ang hinihingi.  Gusto natin nasa atin na pagdaka.

Sa Mabuting balita, ito din ang mentaledad nang maraming Israelita. Pinagdudahan nila si Hesus. They even questioned where Jesus came from. Gusto nila na makita nila ang mga patunay na si Hesus na nga ang Kristo. Pero hindi ganito gumalaw ang Diyos. Ayaw nilang pag-isipan at tingnan ang ginagawa ni Hesus at mula dito ay magpasya kung si Hesus na nga ang Kristo.

Ang Diyos ay hindi nagmamadali. Meron siyang plano at ang plano niya ang pinakamagandang plano. Katunayan niyan ay matagal na panahon bago niya ipinadala ang kanyang Anak. Inihanda muna niya ang mga tao. At sa tamang panahon, isinilang si Hesus. Kahit na nga si Hesus hindi rin nagmadali. Dumaan siya sa pagiging sanggol, pagiging bata hanggang sa magkaedad. Di rin siya nagmamadali sa kanyang muling pagbabalik.

Ang hamon sa atin sana maintindihan natin ang plano nang Diyos. Huwag tayo maiinip kung hindi agad nangyayari ang ating mga plano at mga pansariling kagustuhan. In God’s wisdom and in God’s time sasagutin nang Diyos ang ating mga panalangin. Sa pananampalataya iwasan ang Sari-Sari Store mentality. Remember: Patience is a virtue!