Kandila

Kandila

(Jn. 5:31-47)

Nakakatuwang pagmasdan ang kandila. Pero ang kandila ay hindi ginawa para pagmasdan. Ito ay ginawa upang sindihan at makapagbigay nang liwanag nang sa gayon ay makita natin ang nasa paligid kapag madilim.

Kapag maliit ang sindi nang kandila, matagal itong mauubos pero kaunting liwanag lang ang maibibigay nito. Pero kapag malaki ang sindi nang kandila, madali itong mauubos pero malaking liwanag naman ang maibibigay nito.

Ang kandila ay para ding si Juan. Ang sabi niya: “He must increase and I must decrease.” Siya ang liwanag na gumabay sa pagdating ni Kristo. Siya ang nagpatotoo na si Hesus ang Kristo. Tinanglawan niya ang daan patungo kay Kristo. Di niya inakay palapit sa kanya ang mga tao kundi itinuro niya and daan palapit kay Kristo.

Sa panahon ngayon, marami sa atin ang gusto ay mapalapit sa sarili ang ibang tao. Gustong sumikat, gustong makilala,  gustong hangaan nang mga tao, gustong angkinin ang mga tao. Tingnan natin sa telebisyon. Ang dami nang advertisements nang mga pulitiko para ipakilala ang sarili, nagpapahayag na sila ay magaling, na meron silang dalisay na kalooban upang kapwa ay matulungan, na sila ay ang nararapat para sa posisyon na kanilang tinatakbuhan…pero sa kahuli-hulihan, sariling interes lang pala ang ipinaglalaban.

Ngayong araw na ito, nahirang bilang Santo Papa si Cardinal Jorge Mario Bergoglio, na tatawaging Papa Francisco. Pwede na rin siguro natin siyang tawagin na Papa Kiko...At tayo ay tatawaging ANAKIKO (Anak ni Kiko)…Sa kanyang unang mensahe pagkatapos niyang lumabas sa balkonahe sinabi niya na ito ang umpisa nang paglalakbay nang pagkakaibigan, pagmamahal, pagtitiwala at pananampalataya. Kasama pala natin siya sa paglalakbay at siya ang magiging taga-akay natin. Tutulungan niya tayo sa paglalakbay hindi papalapit sa kanya kundi patungo kay Kristo.

Sana maging katulad din tayo nang kandila, nagbibigay nang liwanag pero hindi para sa kanyang sarili kundi para makita nang iba ang paligid lalo na sa oras nang kadiliman. Maging instrumento tayo para mapalapit ang ibang tao sa Diyos. Maging liwanag para sa lahat…