Kayamanan

Kayamanan
(Lk. 12: 13-21)

“The thing you do not want to give you do not own, it owns you.”

May isang kwento tungkol sa isang santo na taimtim na nagdarasal. May isang mayaman naman na lumapit at nagbigay ng isang bag na puno ng mga pera. Sabi ng mayaman: “Alam kong gagamitin mo yang pera na yan para sa mga nangangailangan sapagkat ikaw ay lingkod ng Diyos.” Nagsalita ang santo: “Hindi ko alam kung tatanggapin ko ito o hindi.”

Tinanong ng santo ang mayaman: “Mayaman ka ba? Marami ka pa bang pera?” Sumagot naman ang mayaman: “Marami pa po akong pera sa aking bahay.” Muli siyang tinanong ng santo: “Gusto mo pa ba na dumami ang iyong pera.” Sumagot naman siya: “Gusto kong dumami pa ang aking pera kaya nga nagtatrabaho akong maigi. At saka yun ang lagi kong ipinagdarasal, na dumami lalo ang kayamanan ko.”

Iniabot ng santo ang pera sa mayaman at sinabi: “Hindi ko matatanggap ang pera na ito.” Nagtaka ang mayaman at nagtanong: “Bakit naman hindi mo yan tatanggapin.” Sumagot ang santo: “Ang turo kase sa amin ay bawal kaming tumanggap ng kahit ano ang mayaman mula sa mahirap. Hindi ka mayaman sapagkat wala kang kasiyahan sa mga biyayang nasa iyo. Isa kang mahirap sapagkat hindi ka kuntento sa nasa iyo.”

Ang mga bagay na hindi mo kayang ibigay ay hindi mo pag-aari; ikaw ang nagiging pag-aari ng bagay na iyon.”

Sa Mabuting Balita itinuturo sa atin ni Hesus ang tunay na mahalaga sa mundong ito. Ang tunay na kayamanan ay walang iba kundi ang Diyos at ang mga biyayang natatanggap ay dapat na ginagamit upang lalong maparangalan ang Diyos sa pamamagitan ng pagbabahagi sa iba lalo na sa mga nagangailangan.

Ang sabi nga ng Gaudium et Spes: “God destined the earth and all it contains for all men and all peoples so that all created things would be shared fairly by all mankind under the guidance of justice tempered by charity.” (#69)

Ang tawag sa pagbibigay sa nangangailangan nga mga bagay na hindi na natin kailangan ay katarungan. Sabi ni St. Ambrose na quoted ng PCPII: “You are not making a gift of your possessions to the poor person. You are handing over to him what is his. For what has been given in common for the use of all, you have arrogated to yourself. The world is given to all, and not only to the rich.”

Sabi sa Yahoo News ay ito daw ang pinakamayamang pinoy: Henry Sy and Family ($12 billion); Lucio Tan and Family ($7.5 billion); Andrew Tan ($4.6 billion); Enrique Rason ($4.5 billion); John Gokongwei, Jr ($3.4 billion); Jaime Zobel de Ayala and Family ($3.1 billion); Aboitiz Family ($3 billion); David Consunji ($2.7 billion); George Te and Family ($2.6 billion); Lucio and Susan Co ($1.9 billion).

Mapapansin natin na nasa ilang tao at pamilya ang malaking kayamanan na sana ay ibinabahagi sa iba lalo na sa nangangailangan. Hindi masama ang kayamanan lalo na nga at nakamit ito sa makatarungang pamamaraan. Nagiging masama ito kung papaano ito ginagamit. Ang sabi nga: “Ang yaman ay maaaring magamit sa pagpasok sa langit; ngunit pwede rin itong magbulid sa atin sa impyerno.”