Tag-ulang Pasukan

Tag-ulang Pasukan

Am wondering lately: sinadya ba na tag-ulan magsimula ang pasukan?

Mahirap pag tag-ulan. Papasok ka sa eskwelahan na basa ang iyong gamit. Basa ang iyong sapatos kaya nga di maiiwasang mangamoy. Kahit na nga meron kang dalang payong o kaya ay kapote, di pa rin maiiwasang mabasa. Mahirap sumakay nang tricycle o kaya nang jeep kapag ito ay punuan at unahan din dahil sa dami nang pasahero. Kaya nga pag wala ka nang masakyan eh magtityaga ka na lang na suungin ang lakas nang ulan at bahang daan. Di lang mangangamoy ang iyong paa, ito ay magkakaalipunga pa. Ang mga labahin ay nangangamoy din…buti na lang meron naimbentong panlaba na kahit hindi ibilad sa araw ay mabango na din ang mga damit.

Pero ang tag-ulan ay hindi lang nangyayari sa panahon. Pati sa buhay minsan dumarating ang tag-ulan. At kung mamalasin ka baka bagyo pa nga ang dumating. Tutulo ang luha, babaha ang mga problema, tatamaan nang kidlat ang damdamin, magugulo ang isip sa malalakas na kulog nang mga pagsubok, lalamigin sa pagmamahal mula sa mga taong inaasahan…dagdag pa ang brownout na dala nang patung-patong na kabulukan nang sistemang umiiral.

Pero sa panahon nang tag-ulan nagsisimula ang panahon nang pasukan. Ito ang pagkakataon para sa mga estudyante na matututo nang mga aralin na magagamit sa kinabukasan. Ang mga estudyante ay magbabasa nang mga aklat na kapupulutan nang aral. May mga assignment na kailangang bigyan nang panahon. May mga tanong na dapat na sagutan.

Pero alam din natin na hindi lahat ay nagtatagumpay sa pag-aaral. Meron ding bumabagsak. May kini-kick-out. May lagi sa guidance office. Meron din laging nganga…Gayun pa man ay hamon ito para matuto. Ang sabi nga: “You are studying not for grades but for life…” Kung may mali pwede namang burahin o kaya ay ulitin. At hwag mag-alala, ang mga teachers ay nanjan para gumabay at hindi para sa iyo ay magpahirap. Pwede rin tayong magpahinga at saka bumalik. Ang sabi nga nang Bread: "Saying goodbye doesn't mean forever..doesn't mean we'll never be together again..."

Tag-ulang pasukan. Tag-ulan ba ang buhay mo? Hwag kang mag-alala, simula yan nang pagkatuto.

Sa likod nang madilim na ulap nagkakanlong ang haring araw.

Sa pasukan ay may graduation sa huli na hinihintay.

Pasok na tayo kahit bumabagyo…pero hwag kalimutan ang baon mo!