Independence Day

Independence Day
(Mt. 5: 17-19)

Independence Day. Araw nang kalayaan. Pero ano nga ba ang tunay na kahulugan nang kalayaan?

Ang ipinagdiriwang natin ay ang paglaya nang bansa mula sa mahabang pang-aalipin nang mga mananakop. Matagal din napailalim ang mga Pilipino sa mga dayuhan at dahilan sa ating mga bayani, sa pagbubuwis nila nang buhay, sa pag-aalay nila nang kanilang dugo, nakamit din ang minimithing kalayaan. Pero malaya na ba talaga ang Pilipinas?

Sa level nang bansa sa aking palagay ay hindi pa rin totoong malaya. Kung titingnan kase sa mas malaking perspektibo, may mga bagay pa ring sunod-sunuran ang Pilipinas sa ibang bansa na ang hangad ay kunin ang kayamanan nang Pilipinas. Halimbawa nito ay ang isyu nang pagmimina, ang panggigipit sa bansa para payagan ang mga produktong galing sa kanila at ibenta sa ating bansa katulad nang mga contraceptives at mga produktong gamit sa agrikultura (insecticides, pesticides, genetically modified seeds, etc.).

Sa level naman nang personalidad, may mga pag-iisip na tila bumabaluktot sa tunay na kahulugan nang kalayaan. Halimbawa sa mga bata at mga estudyante. Minsan ang iniisip nila ay hindi sila malaya kapag pinapagalitan sila sa tuwing ginagabi nang uwi dahil sa barkada. Pakiramdam nila hindi sila malaya kapag sinesermunan sila kapag hindi sila nag-aaral at ang inaatupag sa maghapon ay ang paglalaro nang candy crush. Para sa kanila ang kalayaan ay ang paggawa nang hindi sila pinapakialaman.

Gayun din halimbawa sa mag-asawa. Sabi nga nung mga tambay sa kanto, ang pag-aasawa daw ay parang hawla o kulungan. Ang mga ibon na nasa labas ay gustong makapasok pero ang mga nasa loob nang hawla ay gustong makawala. Sa relasyon sa loob nang pamilya, minsan ay nagkakabanggaan nang ugali kase may kanya-kanyang kagustuhan at ang gusto nang isa ang pinipilit na ipasunod sa iba.

Ano nga ba ang tunay na kahulugan nang kalayaan?

Sa Mabuting Balita sinabi ni Hesus: “Hwag ninyong akalain na naparito ako para pawalang-bisa ang Batas at Mga Propeta. Naparito ako hindi upang magpawalang-bisa kundi upang magbigay-karapatan.”

Para sa mga Hudyo kapag nabanggit ang batas meron itong apat na pwedeng pakahulugan. Una, ang sampong utos nang Diyos. Ikalawa, ang unang Limang Aklat o ang Pentateuch. Ikatlo, ang buong Skriptura. At ang huli, ang tinatawag na Oral/Scribal Law.

Ang Scribal Law ay mga mumunting batas na interpretasyon nila sa mga naunang batas. Umaabot ito nang libong mga kautusan at ito ang ipinapapasan sa mga tao. Dahil dito nakalimutan na nila ang tunay na diwa nang batas. Naging alipin na sila nang mga batas na ginawa nila. Hindi na sila naging malaya.

Ang kahulugan pala nang kalayaan ay hindi yung paggawa na walang pipigil o yung paggawa para sa sariling kaligayahan. Ang batas na tinutukoy ni Hesus, ang mga batas na ibinigay nang Diyos ang magpapalaya sa bawat isa kung ito ay susundin.
Ang tunay na paglaya pala ay yung pagsunod sa kalooban nang Diyos. Ang kalooban nang isang tao ay dapat na nakakawing sa kalooban nang Diyos.

Gusto mong maging tunay na malaya? Sundin ang batas nang Diyos, ang Batas nang Pag-ibig…