Teacher…Teacher…
(Mt. 14: 13- 21)
Gusto mo bang magkaasawa ng teacher?
Nagkita-kita kami minsan magkakabarkada at napag-usapan namin ang
tungkol sa pag-aasawa. Sabi nung isang barkada namin: “Ay naku pare,
kapag mag-aasawa ka ay hwag na hwag na isang guro.” “Bakit naman?”
tanong nung isa naming kasama.
Sumagot naman siya: “Kase pag teacher ang asawa mo…wala nang panahon sa iyo. Hanggang sa bahay
dala ang trabaho. Maghahanda ng lessons…mag-check ng
exams…mag-research…maagang aalis ng bahay at late na uuwi…at minsan pa
uuwi ng bahay na masama ang loob kase pasaway ang mga estudyante, at sa
akin ibinabaling ang galit.”
Wala daw panahon sa tahanan ang
teacher…pero yung barkada namin, hayun…nakakatatlo na ang anak at
magkasama pa rin silang mag-asawa!
Busy…Busy…Busy…Yan ang mga
teacher. Kaya nga marami din sa kanila ay tumatanda na at nakakalimutan
ng mag-asawa kase masyado silang natuon ang pansin sa pagtuturo. Lampas
na sa walong oras ang trabaho pero pagdating sa bahay ay may
responsibilidad pa rin.
Kahanga-hanga ang isang guro.
Sa Mabuting Balita si Hesus ay busy din. Pero hindi lang siya busy sa
gawain. Mabigat din ang kanyang damdamin sapagkat nabalitaan niya ang
nangyaring pagpatay kay Juan Bautista. Gusto niyang manahimik upang
harapin ang nararamdaman niyang kalungkutan. Gusto niya na mapag-isa at
lumayo muna upang pakalmahin ang kanyang sarili. Pero sinundan siya ng
maraming tao.
Ganun man ang nararamdaman ni Hesus, hindi niya
tinalikuran ang mga tao na sumunod sa kanya. May pinagdadaanan man si
Hesus pero hindi niya tinakasan ang mga tao sapagkat alam niya meron
ding pinagdadaanan ang mga tao. Sinundan siya sapagkat meron silang
pasanin at si Hesus ang kanilang pag-asa.
Ganun pala ang buhay.
Kahit may pinagdadaanan tuloy pa rin ang paglalakbay. Hindi dahilan na
may pinagdadaanan para hindi tumulong sa nangangailangan. Hindi dahilan
ang kalungkutan para magbahagi ng kasiyahan. At hindi dahilan ang
kasawian para hindi magpakita ng pagmamahal. Sa pagbabahaging ito ng
sariling buhay masasalamin ang tunay na kadakilaan.
So…Mag-aasawa ka pa ba ng teacher?
Walang komento:
Mag-post ng isang Komento