Pork

Pork
(Lk. 12: 49-53)

(Ang kwentong ito ay galing kay kuya Norman Norman Novio at kinopya ko ng walang paalam, he he he)

"Naglalakad sa bukid ang isang pilosoper. Nakakita siya ng tanim na kalabasa na hitik sa bunga na pawang malalaki. Sabi niya sa sarili, "Mukhang mali ito. Malalaki ang bunga ng kalabasa ngunit ang kinakapitan nito ay halaman lang kaya hayan tuloy nakasayad ito sa lupa."

Sa patuloy niyang paglalakad ay nagawin siya sa isang puno ng duhat na hitik sa bunga at sinabi muli sa sarili, "Tamo itong punong ito, ubod ng laki at tibay pero anliliit naman ng bunga. Hindi totoong may Diyos, dahil kung mayroon, ginawa niya ang mga ito ng naaayon sa katangian ng isa't-isa. Sa babagayan ng puno sa bunga. Ang bunga ng kalabasa ay dapat sa puno ng duhat at ang bunga ng duhat ay dapat sa halamang kalabasa."

Hanggang siya ay napagod at nagpahinga sa ilalim ng puno ng duhat. Humampas ng malakas ang hangin at nagbagsakan sa kanyang ulo ang mga maliliit na bunga ng duhat. "Ngayon alam ko na kung bakit ganoon. Kung kalabasa ang bumagsak sa ulo ko, PATAY na ako!"

Matalino at marunong ang Diyos at hindi natin kayang arukin ito. Gayun pa man ay ang kalooban niya dapat lagi ang ating sinusunod. Ito dapat ang ating unang pinapahalagahan.

Sa unang pagtingin ay tila hindi nararapat ang sinabi ni Hesus na "Sa akala ba ninyo ay dumating ako para magbigay ng kapayapaan sa lupa? Hindi, sinasabi ko sa inyo, kundi paghihiwalay." Tila bumabangga ito sa katauhan niya na prinsipe ng kapayapaan.

Pangunahing pinapahalagahan kahit na saan mang kultura ang pamilya. Ang sabi nga ay "blood is thicker than water." Kaya nga kapag meyembro na ng pamilya ang pinag-uusapan ay ating ipinagtatanggol at ipinaglalaban. At kahit na may maling nagawa ay ating pinagtatakpan. Kapag naliligaw ng landas ang kasamahan ay nagbubulag-bulagan.

Pero kailangang gumawa ng desisyon ang isang tagasunod ni Kristo. Kailangang una siya lagi. May pagkakataong kailangan mamili kung pamilya o si Hesus, may oras na kailangang iwan ang tahanan dahil sa plano ng Diyos...Mas mataas pa sa pagpapahalaga sa pamilya ang pagpapahalaga kay Hesus.

Hindi pala pwedeng magpadala na lang sa agos. Kailangang gumawa ng tindig para kay Hesus. Hindi pwedeng manahimik at sabihin na para ito sa kapayapaan. Kailangang itama ang pagkakamali. Kailangang ang katotohanan ay mamayani.

Tanggalin na ang Pork barrel!